Pagsapi sa ex-political detainees initiative

PAGSAPI SA EX-POLITICAL DETAINEES INITIATIVE (XD)

ni Gregorio V. Bituin Jr.

Una kong nakadaupang palad ang grupong Ex-Political Detainees Initiative (XD) noong Enero 13, 2015 nang sila'y mag-ayuno o fasting sa panahon na paparating si Pope Francis dito sa Pilipinas. Naglagay sila sa kanilang t-shirt ang mga katagang "We are on fasting. Free all political prisoners now!" Nakasulat nga sa isang streamer na kulay puti ay "Palayain ang lahat ng mga biktima ng torture, senior citizen, may karamdaman, at deka-dekada nang detenido at bilanggong pulitikal!" Sa isa pang streamer ay nakasulat ang isang panawagan kay Pope Francis na parating na sa bansa, "Your Holiness, please help and pray for our concern with President Aquino. Free all political detainees and prisoners."  Hinihiling nila na nawa'y maging instrumento si Pope Francis upang mapalaya ang mga bilanggong pulitikal.

Ang pangulo ng XD ay si Ka Edwin, na kasama sa Partido Lakas ng Masa (PLM). Isa siya sa mga staff ng Task Force Detainees of the Philippines-National Capital Region (TFDP-NCR) noong panahong ako'y nakapiit sa Pasay City Jail noong taong 2000 dahil sa rali laban sa Visiting Forces Agreement (VFA) at kinasuhan ng pulisya ng direct assault, na dapat ay tatlong taon kong bubunuin. Subalit dahil sa tulong ng TFDP-NCR at ng aking grupong Sanlakas ay nakalaya ako. Hindi ko rin malilimutan ang malaking tulong ni kasamang Judy Ann ng Sanlakas at kasama ko sa nasabing rali habang ako'y nakakulong hanggang sa ako'y lumaya.

Maraming beses na rin akong nagrali, nakatakbo, hindi nahuli, nag-OP-OD, nahuli, nadala sa presinto, nagrali, nabugbog sa rali, nahuli muli, nakalaya. Patuloy ang pagkilos sa kabila ng mga panganib upang prinsipyadong makibaka tungo sa tagumpay ng mga simulain at pangarap na lipunan.

Kaya nang makilala ko ang XD ay agad akong nagboluntaryong tumulong sa kanilang kampanya. Sumang-ayon naman sina Ka Edwin at ilan pang mga kasama sa XD. Subalit nito lamang Setyembre 2016 talaga ako naging aktibo, lalo nang sumama ako sa ikaapat yatang pagkakataon sa BRAT (Basta Run Against Torture) 2016, isang takbuhan mula sa harapan ng tanggapan ng Commission on Human Rights (CHR) hanggang sa loob ng Quezon Memorial Circle kung saan nagkaroon ng programa. Tumula ako at isa pang kasama bilang kinatawan ng XD sa BRAT.

Ang ilang mga kasama ko sa XD ay nakulong sa Muntinlupa noong panahong kami naman ang dumadalaw sa kanila sa panahon bago mag-Bagong Taon. Binuo nila ang XD noong Nobyembre 17, 2012 sa Bulacan. (Aba, kasabay pala ito ng ika-71 kaarawan ng aking ama.)

Isang aktibidad bilang kasapi ng XD ang tila baga nagpatibay sa aking paninindigan, lalo na sa usapin ng mga bilanggong pulitikal at karapatang pantao. Naganap iyon noong Setyembre 24-25 nang naimbitahan ako sa Balay Rehabilitation Center bilang isa sa apat na kinapanayam at ginawan ng talambuhay bilang mga dating bilanggo hinggil sa naranasan naming tortyur nang kami'y mapiit. Setyembre 27, 2016, ika-31 anibersaryo ng Balay, ay binasa ang aming mga talambuhay sa harap ng maraming tao sa isinagawa nilang programa na ginanap sa Bantayog ng mga Bayani. Doon ay hinandugan ko naman ng tula ang Balay para sa kanilang ika-31 anibersaryo. Pakiramdam ko'y mas naging matikas ang aking pagiging mandirigma matapos ang programang iyon.

Mula noon ay nagpatuloy na ang aking pagkilos sa loob ng XD at itinalaga rin nila ako bilang opisyal na kinatawan ng XD sa grupong iDefend, lalo na sa Komite sa Edukasyon nito. Sa ngayon ay nagsasagawa ako ng ilang mga sulatin para sa XD.

Gayunman, tila malayo pa ang aking lalakbayin upang magampanan ng taospuso ang mga itinalagang gawain sa akin ng XD dahil na rin sa iba ko pang samahang kinikilusan, tulad ng pagiging pultaym sa Bukluran ng Manggagawang Pilipino (BMP). Tumutulong din ako sa Sanlakas, Metro Manila Vendors Alliance (MMVA), Kongreso ng Pagkakaisa ng mga Maralita ng Lungsod (KPML), at grupong IDefend para sa ilang gawain. Subalit hindi naman magkahiwalay ang paninindigan ng XD sa mga grupong ito dahil nagkakaisa pa rin kami sa prinsipyo't panawagang itayo ang isang lipunang makatao kung saan wala nang tortyur at nakukulong dahil lang sa kanilang pulitikal na paniniwala.

Mabuhay ang mga kasama sa XD Initiative! Palayain ang lahat ng mga bilanggong pulitikal!

Dalawang tulang binigkas sa "Pray for Eight" Concert sa Luneta

DALAWANG TULANG BINIGKAS SA "PRAY FOR EIGHT" CONCERT SA LUNETA
ni Gregorio V. Bituin Jr.

Isang pambihirang pagkakataon ang ibinigay sa inyong lingkod ng mga kasapi ng CAMB (Campaign Against the Marcos Burial at Libingan ng mga Bayani), nang ako'y nakatula sa harapan ng maraming tao noong Nobyembre 6, 2016 na ginanap sa Lapulapu Monument sa Luneta sa Maynila.

Pambihirang pagkakataong hindi dapat palagpasin, kaya inihanda ko ang aking sarili.

Noong panahong iyon ay may nakahanda na akong tula, ngunit hindi pa tungkol sa mangyayaring pagpapasya ng mga hukom ng Korte Suprema sa Nobyembre 8, 2016, dahil hindi agad ako nakagawa dahil sa dami ng gawaing inaatupag.

Nakita ako ni Dino Manrique na nakaupo sa tabi ng mga audience, at ako'y kanyang tinawag. Pinapunta sa likod ng stage at sinabihan ang emcee na ako'y tutula. Mabuti na lang at may handa akong tula na naka-print sa bond paper.

Tinawag ako ng emcee at sinabihang pag maglilitratuhan na ay saka ako tutula. Nais kasi ng isang broad sheet na kumuha ng litrato na pam-front page. At sinabi ng emcee sa mga tao na magpunta na sa harapan ng stage upang mag-pose para sa litrato.

Nang magsimula ang litratuhan ay binasa ko naman ang unang apat na saknong ng anim na saknong ng tula kong "Bawat Bato para sa Bawat Bayani", na nang matapos ang ikaapat na saknong ay nagpalakpakan ang mga tao. Matapos ang litratuhan ay nagsibalik na sa kanya-kanyang pwesto ang mga dumalo, saka ako muling tinawag ng emcee upang magbasa ng isa pang tula. Binasa ko naman ang tulang "Si Liliosa Hilao".

Narito ang dalawang tulang aking binasa:

HINDI BAYANI ANG DIKTADOR

simbolo ang Libingan ng mga Bayani
ng dangal, ng tapang, ng giting ng marami
silang totoong nagpakasakit, nagsilbi
sariling buhay ang alay, bayan ang saksi

may isang pinunong malaon nang humimlay
na diktador sa bansa noong nabubuhay
nais ng mga kaanak nitong namatay
na doon ay ilagak na ang kanyang bangkay

ngunit kayraming nagprotesta, humihiyaw
di marapat doon ang taksil na nagpataw
ng martial law na sa bukas nila'y gumunaw
berdugong diktador na sa laya'y umagaw

bakit ang di bayani'y ililibing doon
bakit di na ilibing sa kanyang rehiyon
libingan ng bayani'y simbolo ng nasyon
ang di marapat ay huwag doon ibaon


SI LILIOSA HILAO

mula Pamantasan ng Lungsod ng Maynila
estudyanteng may katapatan sa adhika
nang dahil sa kanyang maagang pagkawala
ang pamilya niya'y lumuha’t naulila

punong-patnugot ng Hasik, na publikasyon
ng kamag-aaral ng paaralang iyon
binatikos sa pahayagan nilang yaon
ang diktaduryang Marcos na animo’y leyon

siya'y iskolar, magaling na estudyante
kandidato siyang maging summa cum laude
ngunit naglaho ang ningning ng binibini
nang siya'y dinukot ng apat na ahente

ng konstabularyang galamay ng tirano
na makapangyarihan sa buong gobyerno
hawak sa leeg ang maraming pulitiko
at kamay na bakal ang pinairal nito

ayon pa sa ilang ulat, si Liliosa
ay pinahirapan, ginamitan ng pwersa
ginahasa, pinaslang ng Konstabularya
unang biktima ng madugong diktadura

ang kwento ni Liliosa'y dapat masambit
sa salinlahi ngayon nang di na maulit
kay Liliosa at sa iba pang ginipit
mailap na katarungan nawa'y makamit


Ito naman ang kinatha kong tula matapos ang aking pagbigkas, at habang naghihintay matapos ang konsiyerto. Nakaupo lamang ako sa gilid habang nanonood ng konsiyerto ang mga kasama.

PAGNINILAY SA "PRAY FOR EIGHT" CONCERT

dinggin nawa ng walo o higit pang mahistrado
ang tinig ng bayan at pintig nitong aming pulso
na kasaysayan ay kaakibat ng pagkatao
at ugat ng lahing dapat buo, di binabago

patuloy na humihikbi ang maraming pamilya
ng mga nawala sa panahon ng diktadurya
hanggang ngayon, kay-ilap ng ninanasang hustisya
nawa, katarungang asam na'y mapasakanila

pagpapasiyahan nila kung wasto bang ilibing
sa Libingan ng Bayani ang diktador ng lagim
sugat pang di hilom ay huwag budburan ng asin
kasaysayan pag nayurakan ay di malilihim

kami'y umaasang maging patas ang inampalan
at di yuyurak sa pagkatao't dangal ng bayan
O, hukom, maalam ding maningil ang kasaysayan
mga pasiya nyo nawa'y maging makatarungan